Шүүгчдийн хорооны удирдах зөвлөл 2016 оны 09 дүгээр сарын 05-ны өдөр Нийслэлийн Эрүүгийн хэргийн давж заалдах шатны шүүхийн хуралдааны танхимд хуралдлаа. Хуралд Шүүгчдийн хорооны тэргүүн Ц.Оч, Удирдах зөвлөлийн гишүүн Б.Цогт, Х.Эрдэнэсувд, Г.Даваадорж, Э.Зоригтбаатар, Д.Дэлгэрцэцэг, С.Амардэлгэр, Т.Ганчимэг /онлайнаар/ нар оролцов.

    Хурлаар Монголын Хуульчдын холбооны ээлжит бус Их хурал 2016 оны 10 дугаар сарын дундуур зохион байгуулагдах гэж буйтай холбогдуулан уг ажилд оролцох шүүгч нарын оролцоог хангах, хэлэлцэх асуудлын хүрээнд шүүгчдийн саналыг уламжлах зорилгоор дараах асуудлуудыг хэлэлцэж шийдвэрлэв.

1. Ээлжит бус их хурлаар Хуульчийн эрх зүйн байдлын тухай хууль, Монголын Хуульчдын холбооны дүрэмд нэмэлт өөрчлөлт оруулах санал боловсруулах асуудлыг хэлэлцэхээр тусгажээ. Иймд Хуульчийн эрх зүйн байдлын тухай хууль, Хуульчдын холбооны дүрэмд өөрчлөлт оруулах саналыг нэгтгэн боловсруулах ажлын хэсэг байгуулж, боловсруулсан саналыг 2016.09.20-ны өдрийн дотор Хуульчдын холбооны Зөвлөлд хүргүүлэхээр тогтлоо. Ажлын хэсгийн ахлагчаар Нийслэлийн Иргэний хэргийн давж заалдах шатны шүүхийн Ерөнхий шүүгч Ж.Оюунтунгалагийг ажиллуулахаар болов. 
2. Шүүгчдийн хорооноос Зөвлөлд төлөөлөх гишүүнийг сонгох сонгуулийг зохион байгуулах ажлын асуудлаар: Хуульчийн эрх зүйн байдлын тухай хуулийн 48 дугаар зйүлийн 48.4-т зааснаар Зөвлөлийн гишүүдийн бүрэн эрхийн хугацаа дуусгавар болсонтой холбогдуулан Шүүгчдийн хорооноос Зөвлөлд төлөөлөх гишүүдийг сонгох сонгуулийг Хуульчдын холбооны цахим сонгуулийн системийг ашиглан 2016.09.12-ны өдрийн 9:00 цагаас 2016.09.16-ны 18:00 цагийн хооронд нэр дэвших, 2016.09.19-ний өдрийн 9:00 цагаас 2016.09.30-ны өдрийн 18:00 цагийн хооронд санал хураах ажлыг зохион байгуулахаар тогтлоо.
3. Мэргэжлийн хариуцлагын хорооны гишүүдийг сонгох, Их хурлын төлөөлөл сонгох сонгуульд оролцох асуудлаар. Хуульчийн эрх зүйн байдлын тухай хуулийн 63 дугаар зүйлийн 63.2-т зааснаар Хуульчдын холбооны Мэргэжлийн хариуцлагын хорооны гишүүдийн бүрэн эрхийн хугацаа мөн дуусгавар болж байгаатай холбогдуулан хорооны гишүүдийг сонгох сонгуулийг анхдугаар их хурлын жишгээр холбоо нэгдсэн байдлаар зохион байгуулах нь зүйтэй хэмээн үзлээ. Харин Шүүгчдийн хорооны зүгээс Хуульчийн эрх зүйн байдлын тухай хуулийн 63 дугаар зүйлийн 63.4-т заасан бүрэн эрхийн хүрээнд тус хороонд нэр дэвшигчдэд санал өгөх сонгуулийн ажиллагаанд шүүгч-гишүүдийн оролцоог хангаж, дэмжиж ажиллахаар тогтлоо.
4. Бусад асуудлаар: Монголын Шүүгч эмэгтэйчүүдийн холбооноос 2016.08.31-ний өдрийн 10 тоот албан бичгээр “... Сингапур улсад 2016 оны 09 дүгээр сарын 29-30-ны өдрүүдэд “Олон Улсын Гэр бүлийн тухай хууль-2016” сэдэвт бага хуралд Монгол Улсаас оролцох хоёр шүүгчийн онгоцны тийз, ирц очих замын зардалд дэмжлэг үзүүлэх” тухай хүсэлтийг хороонд ирүүлснийг хэлэлцээд, дэмжлэг хүсч Хуульчдын холбоонд уламжлах нь зүйтэй гэж үзэв.

    Түүнчлэн Монгол Улсын Хууль Зүй дотоод хэргийн Сайд С.Бямбацогтоос 2016.09.02-ны өдрийн 1-1/366 тоот албан бичгээр “... Шүүхийн шийдвэр гүйцэтгэх тухай хуулийн шинэчилсэн найруулгын төсөл боловсруулах ажлын хэсэгт нэг албан тушаалтны нэрийг ирүүлэх...” тухай хүсэлтийн дагуу Нийслэлийн Иргэний хэргийн давж заалдах шатны шүүхийн шүүгч Э.Золзаяагийн нэрийг тус ажлын хэсэгт хүргүүлэхээр тус тус тогтлоо.

2016 оны 09 дүгээр сарын 05-ны өдөр

ШҮҮГЧДИЙН ХОРООНЫ УДИРДАХ ЗӨВЛӨЛ