Монгол Улсын Үндсэн хуулийн өдрийг тохиолдуулан өнөөдөр /2016.01.11/ Монгол Улсын Үндсэн хуулийн цэцээс ёслолын үйл ажиллагаа зохион байгууллаа.
Тус үйл ажиллагааны үеэр Монгол Улсын Шинжлэх ухааны гавьяат зүтгэлтэн, академич, доктор, профессор С.Нарангэрэлийг "Хууль зүйн салбарын оны нөлөө бүхий эрдэмтэн" хэмээн диплом гардууллаа. Энэхүү дипломыг Монгол Улсын Үндсэн хуулийн цэц, Хууль зүйн үндэсний хүрээлэн, Монголын Хуульчдын холбоо, Отгонтэнгэр их сургуулийн Хууль зүйн сургууль, Монголын Өмгөөлөгчдийн холбоо, МУИС-ийн ХЗС-ийн Харьцуулсан эрх зүй, Олон улсын эрх зүйн судалгааны төв, Хууль зүйн академи, Хүмүүнлэгийн ухааны их сургуулийн харьяа Билэг дээд сургууль зэрэг 8 байгууллага санаачилан бий болгож өнөөдөр гардуулсан байна. Мөн тус дипломын хамт Хууль зүйн үндэсний хүрээлэнгээс эрхлэн гаргасан "Монголын хууль тогтоомжийн түүхэн эмхтгэл" 20 ботийг дурсгажээ.
