Монголын Хуульчдын Холбооны гишүүн хуульч, Захиргааны эрх зүйн хорооны дэргэдэх Байгаль орчны эрх зүйн дэд хорооны зохицуулагч Р.Лхагвабаяр, “НҮБ-ын Залуу Төлөөлөгч – Байгаль орчны манлайлал 2023” хөтөлбөрийн шилдэг оролцогч, хуульч О.Мөнхнасан нар Бүгд Найрамдах Кени улсын нийслэл Найроби хотноо 2024 оны 02-р сарын 26-ны өдрөөс 03-р сарын 01-ний өдрүүдэд зохион байгуулагдсан “НҮБ-ын Байгаль Орчны Ассамблейн 6 дугаар хурал”-д Монгол Улсын Байгаль орчин, аялал жуулчлалын яамны төлөөллүүдийн хамт амжилттай оролцлоо.

 НҮБ-ын Байгаль Орчны Ассамблей нь дэлхийн хэмжээнд байгаль орчны асуудлаар шийдвэр гаргадаг дээд түвшний хурал бөгөөд хоёр жил тутамд нэг удаа хуралддаг.  Энэ жилийн ассамблейн үндсэн сэдэв нь “Triple Planetary Crisis: Climate change, nature loss, and pollution” сэдвийн хүрээнд дэлхийн 190 гаруй улс орноос нийт 5600 орчим төлөөлөгчид оролцож нийт 19 тогтоолын төсөл, 2 шийдвэрийн төслийг хэлэлцсэнээс 15 тогтоол, 2 шийдвэрийг тус тус баталсан.

Олон улсын хэмжээнд байгаль орчныг хамгаалах чиглэлээр тогтоол, шийдвэр гаргахад ажлын хэсгийн албан болон албан бус хурал, уулзалт, нэгдсэн хурал болон хурлын хүрээнд болж буй бусад үйл ажиллагаанд Монгол улсаас анх удаа залуу хуульчид оролцож байгаа тохиолдол бөгөөд цаашид энэхүү ассамблейд оролцох зорилт тавиад байна.