Хууль зүй, дотоод хэргийн яамнаас Монгол Улсын Засгийн газрын 2016-2020 оны үйл ажиллагааны хөтөлбөрийн “Засаглалын бодлого” зорилтын Шүүх эрх мэдлийн байгууллагын тогтолцоог боловсронгуй болгож, хүний эрх, эрх чөлөөний баталгааг хангах чиглэлээр хэрэгжүүлэх үйл ажиллагааны хүрээнд “Бүх нийтийн эрх зүйн боловсролын хөтөлбөр”-ийн төслийг боловсруулаад байна.
Төслийн танилцуулга, хэлэлцүүлэг өнөөдөр /2017.11.22/ “Хуульчдын танхим”-д болсон бөгөөд хэлэлцүүлэгт Хуульчдын холбооны Ерөнхийлөгч Ж.Хунан болон хуульчид, хуулийн этгээдийн төлөөлөл оролцлоо.
Тус хөтөлбөр нь иргэдийн эрэлт хэрэгцээг хангахуйц эрх зүйн мэдээ, мэдлэгийг цахим болон цахим бус байдлаар нээлттэй, хүртээмжтэй, энгийн хялбарчилсан хэлбэрээр хүргэх замаар бүх нийтийн эрх зүйн боловсролыг тасралтгүй дээшлүүлэх тогтолцоог бүрдүүлэх зорилготой бөгөөд энэхүү зорилгыг хэрэгжүүлэхийн тулд бүх нийтийн эрх зүйн боловсролын агуулга, арга зүйг боловсронгуй болгох, бүх нийтийн эрх зүйн боловсролыг дээшлүүлэхэд шаардлагатай нөөцийг бүрдүүлж, тогтсон сувгуудыг бий болгон, тэгш, хүртээмжтэй, чанартай үйлчилгээг бүх нийтэд хүргэх, иргэдийн эрх зүйн боловсролыг дээшлүүлэхэд бүх талын идэвхтэй оролцоог хангаж, тэдний үйл ажиллагааг уялдуулах гэсэн 3 үндсэн зорилтыг дэвшүүлсэн ажээ.
