ХУУЛЬЧИЙН МЭРГЭЖЛИЙН 2022 ОНЫ ШАЛГАЛТЫН БҮРТГЭЛ ЭХЭЛЛЭЭ

2022-06-10 | Уншсан: 12305

   Монголын Хуульчдын холбооны Зөвлөлийн  2022 оны 06 дугаар сарын 09-ний өдрийн хурлын шийдвэрээр хуульчийн мэргэжлийн шалгалтыг 2022 оны 08 дугаар сарын 24, 25, 26-ны өдрүүдэд Улаанбаатар хотод зохион байгуулахаар товыг тогтоолоо.

  Жил бүр зохион байгуулдаг уг шалгалтад дунджаар 1200 орчим эрх зүйч оролцдог бөгөөд Монголын Хуульчдын холбоо энэ жил 7 дахь удаагийн шалгалтаа зохион байгуулахаар бэлтгэж байна.

  Хуульчийн мэргэжлийн шалгалтын бүртгэл 2022 оны зургадугаар сарын 10-ны өдрийн 14:00 цагт эхэлж, 2022 оны долдугаар сарын 25-ны өдөр дуусах бөгөөд бүртгэлийг https://burtgel.mglbar.mn/ цахим хаягаар явуулна.

  Хуульчийн мэргэжлийн шалгалт нь сорилго, бодлого гэсэн дарааллаар явагдана. Сорилгын шалгалт нь 200 асуултаас бүрдэх бөгөөд үргэлжлэх хугацаа 200 минут байна.

   Сорилгын шалтгалтад тэнцсэн оролцогч Иргэний эрх зүй, Захиргааны эрх зүй, Эрүүгийн эрх зүйн тус бүр нэг бодлогын даалгаврыг гүйцэтгэнэ. Нэг бодлогыг бодох хугацаа 150 минут байх юм.

   Шалгалтад бүртгүүлэх иргэд Хуульчийн эрх зүйн байдлын тухай хууль, Хуульчийн мэргэжлийн шалгалтын журам, Хуульчийн мэргэжлийн дадлагад тооцох журам болон шалгалтад бүртгүүлэх заавартай www.mglbar.mn, burtgel.mglbar.mn цахим хаягт хандан танилцах боломжтой.

            Холбоо барих: 70116007 /Хуульчийн мэргэжлийн шалгалтын хороо хариуцсан мэргэжилтэн/

 

                              МОНГОЛЫН ХУУЛЬЧДЫН ХОЛБОО

Хуульчдын оруулсан зар

Дансны мэдээлэл

Хуульч аппликейшн