ХОВД АЙМГИЙН ХУУЛЬЧДАД ХУУЛЬЧИЙН ҮРГЭЛЖИЛСЭН СУРГАЛТ ЗОХИОН БАЙГУУЛЛАА

2019-09-10 | Уншсан: 149

   Монголын Хуульчдын холбооны Ерөнхийлөгч Ж.Хунангаар  ахлуулсан ажлын хэсэг 2019 оны есдүгээр сарын 09, 10-ны өдрүүдэд Ховд аймагт ажиллалаа.

   Ажлын хэсэг нь Монголын Хуульчдын холбооны үйл ажиллагааг таниулах, хуульчийн үргэлжилсэн сургалт зохион байгуулах зорилготойгоор орон нутагт ажиллаж байгаа бөгөөд орон нутгийн хуульчдаас санал болгосон сэдэвт тулгуурлан сургагч багшийг сонгож, хуульчийн үргэлжилсэн сургалтын 3 багц цаг олгох сургалт явуулсан. Тодруулбал, Нийслэлийн Захиргааны хэргийн анхан шатны шүүхийн шүүгч Д.Халиуна “Захиргааны хэргийн шийдвэр гүйцэтгэх ажиллагаа", "Төрийн албаны хуулийн шинэчилсэн найруулга”, “Улсын бүртгэлийн хууль тогтоомжийн зохицуулалт, шүүхийн практик” сэдвээр, УЕПГ-ын Мониторингийн хэлтсийн хяналтын прокурор Г.Оюунбаяр “Монгол Улсын мансууруулах эм, сэтгэцэд нөлөөт бодисын хууль бус эргэлтийн талаар”, “Эдийн засгийн гэмт хэргийн онцлог, түүнийг шалгахад анхаарах асуудал” сэдвээр, АШУҮИС-ийн багш, доктор, дэд профессор, хууль зүйн магистр М.Цэрэнбат “Стресс менежмент” сэдвээр тус тус хичээл заасан. Сургалтад Ховд аймагт хуульчийн мэргэжлийн үйл ажиллагаа явуулж буй 40 орчим хуульч хамрагдсан.

   Сургалтын үеэр Хуульчдын холбооны Ерөнхийлөгч Ж.Хунан хуульчидтай уулзаж, Хуульчдын холбоотой харилцах, хуульчийн мэргэжлийн үйл ажиллагаа явуулахад ямар саад бэрхшээл байгаа талаар хуульчдын саналыг сонссон. Мөн Монголын Хуульчдын холбооны зургаан жилийн ойг тохиолдуулан Ховд аймгийн Сум дундын шүүхийн шүүгч Ц.Энхжаргал, Прокурорын газрын Зөрчлийн хэрэг бүртгэх ажиллагаанд хяналт тавих хяналтын прокурор Д.Дуламжав, өмгөөлөгч М.Эрдэнэ-Оюун нарыг Хуульчдын холбооны “Хүндэт тэмдэг”-ээр шагнасныг гардуулан өглөө.

   Түүнчлэн тус сургалтын үеэр Хуульчдын холбооны Чиг үүргийн хороод хариуцсан ахлах мэргэжилтэн Г.Санчир “Хуульч” аппликэйшний талаар танилцуулга хийж, мэдээлэл өгсөн юм.

 

 

 

Хуульчдын оруулсан зар

Дансны мэдээлэл

Хуульч аппликейшн